Abdallah ibn Mouchach 7aka 3ala lsanou ennou kif jaych elmalik DhouSourour 5ssar el7arb dhed jaych Chalghoumagne II wou 7oulfaou..oumour lebled etdha3dh3et jemla..la 3ad fomma saba..la 3ad fomma flous..la 3ad fomma tijara..tsakkret besmelah elmane3 elsattarr mel chirat elkoll..wel mouaten fil mammlka walla yesallek feha ebsidi 9naze7..nhar wakel wou nhar wa7el..sghar metet bil charr..ken majach rabbi rahem bi chouaya mtarr..bil 7ram layo93ed feha la 7iwan wou la chjar..ekhi elma7soul ech bech yewakkel wou ech bech ye5alli..ech koun bech tbajjel..sghar wella chiyab wella nsé..ti houma el3ayla elmalka elli 3ala ri7et elri7a ma3ad khalta 3ala chay..laradhi elbehia wel khesba elkoll tfakket men joret matfakk fil 7arb..wel flayek elli kenou yejibou fi 7lib elghoula men barr el3ajam wel 3orban..etdagdgou..wou bech bich etjib bech..bech bich tkhaless eltojjar bil zagg ??!!..ti houa eli ken fil khazina elkoll tedfa3 fedya wou ghramat..ti la 93ad sourdi..et9oul elwahed kammel l7assha men dayer millim eb sob3ou..ahayki tarta3 feha el3etha taou..wel houch 3amel feha chata7 bate7..7ata mil 7arass elli kenou ye3essou 3aleha wallaou lahin yewakklou fil 3ankbout..
Eyeh 3ad elcha3b mte3 elmamlka kifma ay cha3b fi mamlka okhra..ken 3eryen geryen..wou 9al 3adi rabbi yostorna..ken fegri nagri wou seket..9all rabbi yorzo9na nhar ekher..ken moudham mharssel wou ma9al chay..ti elli khdhelek khabbelek..wou rabbi yekhalless la79ou9..ema kif walla ji3an wou mit bil charr..3ad wa9tha fommou t7all..lsanou tetla9..walla yelaouej 3al 7a99 wi ye7eb bayou fil bled..mela ya dini bech yoskot..lil sabr 7doud wou eljou3 kafer ya din eza7.
Haya ella3bed bdet teghli wou tba9be9 bil 7dith ..elli ken yet9al fil treken wou woura la7yout..walla yet9al fil lasoua9 wou fou9 stou7at lebyout..elli ken yemajed walla yedhem..elli ken yenabber walla yesseb..welli ken yon9od walla yehed..wou kothret leklemet elli etaya7 mil 9dar..masalem 7ad..wou wallat bled la3bed feha ma3adech te7tarem fi 7ad..la 3askar wou la gouyad wou la aghaouet wou la wezra wou la 7at elmalek DhouSourour bjoudou..walla ma3ad yekeber fil 3in 7add..wou tratech leklem wallaou trache9..wou weslou elwedhnin elmalek..elli ken 9bal ymen 3al chakaya wou yasma3hou kif yabda 3andou kif..wallaou taou 7dhob 7dhob 9odem 9asrou wou houa ma3adech 3andou wejeh bech ye9abelehom..el3asker yedez wou yefare9 wou houma yarj3ou akther wou akther..ye3aytou wou yenadiou « ya malik ya 7anin ech 3amalt lil ji3anin ».. « ya Sourour ya malek..rahou cha3bek tehlek »
Wa tamdhi alayam
Haya nhar dkhal Chaouech esslem wou Bach Hamba 3al malek Dhou Sourour wou houa 9a3ed fi mou7adthet (93ayda) ma3a chouaya wezra wou chouaya tojjar.
DhouSourour : ech bikom da7min hekka la e7em la dastour..ekhi ma3adech fomma 7echma wou hayba fil hal 9sar ?
Bach Hamba : Sama7na sidna ema elamr fi ghayet elahamia mayesta7malech el eti9ia.
DhouSourour: ech famma zeda ya wejeh elbouma..3arfek 3arfek..men nharet elli jabek chah’bandar elnakhassin sghir 9ad ettaref wou enti et9oul jebet elwaks fi jibek m3ak elhal 9sar.
Bach Hamba (manbouz): aman sidna..ba3ed elsnin hedhi elkoll fi khedemetek et9olli hekka!!
DhouSourour: chnoua?!..mouch 3ajbek klemi?!!!!
Bach Hamba (yabla3 fi ri9ou..khayef 3ala rassou): lé sidna..zin leklem..a3oudh bellah menni..ma7rafni.
DhouSourour: amin..eyeh ech famma zeda..wella en9ollek khali wejeh leghrab elli m3ak ya7ki..yezini mennek elyoum..rit wejehek yezi 3al sbeh.
Chaouech esslem (manbouz): ta7ki 3alia eni sidna?
DhouSourour: chou kifech yetbahness..3amel rouhou mouch 3aref rouhou..mela nahki 3ala chkoun..fomma ghirek lenna?..haya t7arek 7ell fommek ech famma jeyini kif le9dha elmesta3jel?
Chaouech esslem: ellotef 3alik sidna..inchallah fi rass elli may7bekech..9oulou amin chbikom sketou?
Elwezra wel tojjar wou Bach Hamba (fi kelma wahda): AAAAAAAAAAMIIIIIIIIIIIIINNNN
Chaouech esslem: rabbi yahfedh sidna..sidna..rahou ya sidna..edenia khaydha elbarra 9oddem le9ssar..la3bed tlammet..7odhob tamla wou tfare9 9oddem elbab
DhouSourour: chkounhom?!.. chakaya??..kenhom chakaya manich lahi behom..machghoul machghoul.
BachHamba: ya sidna ech men chakaya..hedhom jeyin fi yedehom zlalet wou 3assi..fomma chkoun jeyeb fi yeddou tazdra wou biouch.
DhouSourour: tazdra wou biouch!!!!!!..lmour jeddia wallaet..ech femma..3ala chnoua naouin hak rhout..ech ye7ebou menni..ekhi 3arfin fech ya3mlou..ekhi 3arfin 3ala chnoua 9admin?..rani nensefhom rani enrodhom ghbar..rahom eltaou maraou elwejeh elkhayeb mte3 elmalek DhouSourour..winou el3asker..win el7arass..chbih 9ayed el3askar makhdhach eloumour bi9oua..chbih matsarafech?
Chaouech esslem: sidna hedhom heblou..ja3ou lin jehlou wou kafrou..9allek ech 9al 3alik..jo3na wou krouchna forghet wou klena elcharr..wou et7amel masoulitek ya malek..kollou mennek..houma 9alou sidna mouch eni.
Bach Hamba: sidi eni en9ollek elli lebled fez3et wou enti et9olli 9ayed el3askar mte3 le9ssar wella el7arass..ech bech ya3melelhom..ti 7ata 7efyenin yeghafssouhom..rahou elcharr tala3 men krouch’hom kharej men 3inihom..rahom naouin elcharr ya sidna..9allek enti elmalek wou enti masoul 3alli sarelena..choufelna 7all
DhouSourour: ya wallah a7wel ya wallah a7wel..cha3bi 9am 3alia wou yehaded fia 9oddem 9assri..fi 3oudh ye7med rabbi elli houa 3ayech fi bledi..jey yetaleb fia wi ye7amel fia elmasoulia..tfih tfih 3ala cha3b kifman hakka.
Chaouech esslem: sidna rahou elcha3eb meti9er..faghem..fadd..metnou3er..rahou eljou3 kafer sidna rahou eljou3 kafer..lazemek tsaktou..lazemek etwaklou..lazmek ta3tihh..lazmek tal9alou 7all.
DhouSourour: bellahi sakker 3alia fommek enti..cha3eb fadd..barra yarrah yethadd..ech bech na3malou eni taou ech bech na3malou..9allou a3tih..ech bech na3tih..ech bech na3tih..na3tih elchebb..ekhi hia el7arb khalet feha 7aja..hani nefli m3a el9Erd..alah la trab7ou elli ken elsbeb..9alou a3tih wou waklou..ech bech enwaklou..ti 7ata nekel eni..ti 9a3ed n9ach9ech rani..rani nekel mil 3adham..ti 9a3det 7aja hia..rahou ma3adech 3andi..ma3aaaadech 3andi..ti houa elzghab wou natfouh..allah la trab7ou elli ken elsbeb allah la trab7ou elli ken jorra..9allou lazmek tal9alou 7all..akhhhhhhhhh..
Chaouech esslem: 3ad sidna cha3malna wou ken mli7?
Bach Hamba: sidna cha3malna mela?..leflous mafammech..elmekla mafammech..mela chnoua el7all..ech bech yesakathom hal hijouj wel mijouj..mela joua3a mte3 wedhni..9allek 7alfin ya raou7ou bil mikoul walla ebrass elmas2oul.
Haya wou Houma hekaka elmalek DhouSourour..7ayer yedour yemchi wou yeji machghoul..mouch 3aref ech ya3mel wou ech ye9oul..9am chah bandar eltojjar Salah eddin To7koumoun
Wou ta9adem wou tlab mennou yetekallem.
Salah eddin To7koumoun : sidna tasma7li netkallem la3alla na3ti ray yoslo7 wou yetamen ?
DhouSourour: etkallem ya chahbander samma3na.
Salah eddin To7koumoun : sidna el7all bsit..enti malek wou sahyeb siyassa..3andek jeh wou wahara wou hayba..kif tetkallem t3allem..wou t9arer etamen.
DhouSourour: s7i7 wahwa kadhelek..eni houa ebjoudou.
Salah eddin To7koumoun : mela ya sidna..3alech mata3melech khitab..ta7ki fih elli ensab..tsakket hal houkech elli elbarra..wou t9oulelhom eli rahou et9arer ennou elmasoul bech ytechad wou bech ye5aless ntayej elsarr 3alehom fi joret el7arb..ahaouka tadhreb 3asfourin eb7ajra..tsakathom wou tsabarhom wou tna7i 3alik sbab elkharab elli enti fih.
DhouSourour: ma39oul wou hedheka elli bech yessir..lazemha khitab..ema chkoun elmasoul wou sahib lekhrab..elli rassou lazem yetir.
Salah eddin To7koumoun : sidna lazmou yekoun rass kbir..3andou be3 wou dhre3..ema malazmouch yekoun markzou 7assess..3ala khater koll wahed markzou 7assess 3andou wourah ness..lazmou wahed kif tsamih etohma terkeb 3alih..malazmouch yekoun khatih..lazmou 3abed yemess 9ita3..kif tbadlou maykounech bi ghyabou en9ita3..rak fi 3am zamma..wou ray lekehr yarja3 lik.
DhouSourour: ma39oul ma39oul..ech 9aoulekom ech 9aoulkom..emmmmmmm..madam elness joua3a..ech 9aoulkom fi 9ayed elghaba?..kifou kif blech..lé yebel lé ye3el..yeji khadhar akther mennou wouzir..behi walla lé?
Chaouech esslem li Salah eddin To7koumoun (yewachwech) : wallah mché fi beli bech ye9oul Jaafar Taraman.
Bach Hamba: sidna 9ayed elghaba..mahou fi re7la li bled elFo9man..fi 9afla ba7ria bech yejibelna chouaya mekla..taou 3andou 4 ch’hour melli khraj.
DhouSourour: pffffff..behi ech 9aoulkom fi Haj Mogren..ma7achtou bih 7add wou nharetha maoujoud..e9tira7 momtez wella lé.
Chaouech esslem: 3ad sidna el Haj Mogren mahou edwam lellah..mak 9assitoulou rassou nharetha m3a Ezra Ben Hayoun?
DhouSourour: pffffff..la3net ellah 3ala bliss..terzina fehom..behi ech 9aoulkom fi Hafsa Ibn elWard..ahaouka cha3er wou mou9areb..elcha3b ya3rfou 9afef..wou zid kif yemout..maya5srou 7ad.
Chaouech esslem: sidna kif kif.. Hafsa Ibn elWard nharetha 3atek 3omrou..met bil faj3a.
DhouSourour: chnia hal 7ala hedhi..la famma 7ad enajem en3amel 3alih fil hal bled..mela chkoun bech en7ot mas2oul..haya en9ollek wahed mil hal 4..ya el 9ayed Jarouch khouja ya el9ayed Kar3 Dhib ya ghazi albilad wa sa7eb eljayech Takiou Eddin Birsa ya el Agha Fehm Eddin..mahom 7arbou fi hal 7arb elma7nouna..wou 5assrou kahaou yet7amlou masoulyethom.
Bach Hamba: sidna ghazi albilad wa sa7eb eljayech Takiou Eddin Birsa edwam lellah..mat chahid.. el 9ayed Jarouch khouja edwam lellah..met fil thnia lil ardh elma3rka.. el9ayed Kar3 Dhib chadouh rahina wou mazelna makhalasnech elfedya.. el Agha Fehm Eddin 9atlouh ahali lebled elli yo7kom feha.
DhouSourour: wou 3ala ommi wouh..ti haou ma93adli 7ad..haya en9ollkom..a3mlou 9or3a fi b3dhkom ya Bach Hamba..ya Chaouech esslem ya Saheb etabe3 ya Bach Kateb ya elmotarjem Barvazan.
Bach Hamba wou Chaouech esslem wou Saheb etabe3 wou Bach Kateb (eb a3la southom..mafjou3in mar3oubin behtin): SIDNA..LAAAAAAAAAAAAAAAAAAAAAAAAAAAAAAAAAA..3ALEEEEEEEEEEEEEEEEEEEEEEEEH..CHA3MALNA A7NAAAAAA????!!!!!!!!!!!!!!!!!!!!!!!!!!!!!!!!!!!!!!!!!
DhouSourour: chnoua la chnoua la..eni elli en9arer lazemkom etdha7iou men ajel elwatan.
Bach Hamba: sidna 3aleh ya sidna..rani metrabbi bin yedik..rani keberet fi jalalet ri3aytek..hekka etdha7i bia..rani khdemetek wou 3atitek 3omri wou enti termini..ti konet eni el7am wenti essekin..t9olli af3el naf3al mana9echech jemla..khadmetni baoueb..3achmeoui..wou eni chobik lobik..3aleh ya sidna 3aleh..walla khaterni yetim..3aleh 3aleh lyetim ta3mlou fih hekka 3aleh.
DhouSourour: behi behi..7ammemtli 9albi..mela Chaouech esslem.
Chaouech esslem: ya sidna leh ya sidna..rani 3achirek fi 5demetek..rani dhelek fi machitek..hekka ta3mel fia..9adeh sallamet 3ala 3abed..wou rmit rouhi binek wou bin elmba3bchin wou elmo9malin wel mojrabin elli ye7ebou yeboussouk wi y7amlouk..tdha7i bia sidna.
DhouSourour: behi behi.mela el Bach Kateb..men ghir ni9ach.
Bach Kateb: ya sidna leh ya sidna..rani bou sghra..ya sidna echkoun bech yekteblek 5itabek ken t9ossli rassi?
DhouSourour: behi..3andek el7a9 7achti bik..winou Barvazan manich enra fih..mat9ouloulich met zeda.
Bach Hamba: sidna elmoutarjem Barvazan mché m3a 9ayed elghaba fi 9afla..wou sidna nsi7a lil allah..rahou 3andou jensia okhra..wou moutou yenajem ya3mel mochkla siyassia.
DhouSourour: ye3jebekchi taou mafomma 7ad mosta3ed yet7amel elmasoulia..chnia hal 7ala..haya ma93ad feha ken Saheb etabe3..wou hedhi kelmti lekhra.
Saheb etabe3: sidna leh..ma3andich nharin melli chadit elmanseb.
DhouSourour: kifeh hedhi..3aleh elli 9ablek win.
Saheb etabe3: sidna met fil jabha.
DhouSourour: alahou akber..wou ech hazou elghadi..ya rasul ellah..wenti chkoun 3aynek bellahi..mana3rfekech?
Saheb etabe3: alwazir Abou elkorss Kochber 3ayeni sidna.
DhouSourour: offffffffff menkom offfffffffffff..haya asma3ni ya Bach Keteb..haya ched elabez wou khanteb.. ikhaouni akhaouti eli yosknou fi bledi..rani 7asess bikom wou belli sayer fikom..rahi el 7arb elli t3adet 3ala ryoussna..kletelna ma7soulna wou floussna..rahou eli t3ada mouch chouaya..sakhta wou ta7et 3ala rass el3ayla elmelka wou el ra3ia..7arb met feha 7iwan wou 3orban..wou je3 feha elsghir wel 3eryen..mat9oulech manich nasma3 fikom..rakom entouma menni wou eni likom..rani 7nin wou 3azem wou 7alef bil yemin..eni enched koll maken 3andou jorra wou sbab..wou elmas2oul bech ye5aless elli 3amal..mahma kenet 3andou fi 9albi m3azza wou fi 3ini kber..wou 9araret e3dam el wazir Abou elKorss Kochber..wa salam.
El7adhrin elkoll (behtin wou mouch motwa93in): ABOU ELKORSS KOCHBER !!!!!!!!
DhouSourour: eyeh houa bjoudou..estad3iouh..bech ne3dmouh.
Bach Hamba: sidna rassou bech en9ossouh..wella bech nochn9ouh?
Chaouech esslem: wela na7r9ouh?
Saheb etabe3: wela bech norjmouh?
Bach Kateb : wela fi zit nermiouh ?
DhouSourour: mazelt mouch 3aref?
Salah eddin To7koumoun : sidna tasma7li na3ti nsi7a li jaleltkom?
DhouSourour: tfadhel.
Salah eddin To7koumoun : sidna ken bech ta7r9ouh wela torjmouh..bech ta3mlou mennou chahid..ken bech t9ossoulou rassou wella tchn9ouh..bech ta3mlou mennou rajel sahib maou9ef ..wou ken bech termiouh fil zit..elzit eli bech termiouh fih elcha3b awla yeklou wou yachba3 bih.. DhouSourour: mela ech bech na3mloulou?
Salah eddin To7koumoun : sidna lazem moutou tkoun chani3a..feha 3adheb wou feha “ebra lili maye3taberech..lazem moutou tkoun tkhaouef wou ter3eb elra3ia..lazem etkoun 7dith lil ajyel el9adma..wel cha3b ya3ref eli hedhi etnajem etkoun 3orf wou 3ada.
Bach Hamba: sidna 3andi fekra..sidna mouch marra jaouek hadia 10 kleb wa7chia..yeklou koll chay yo9robhom wi yekhaf menhom bnadem..enti 3alech matrimichi fi westhom..yenhchouh wi yeghadghdouh..menhom yeklou wou menou elcha3b yetfarej..wou terbe7 mil chirat elkoll?
DhouSourour: fekra behia..mela 3ala dhalin amin..nadiouhouli.
Haya jarya mché BachHamba cha5siyan yelaouej 3ala elwazir Kochber..wou 3elmou elli elmalek DhouSourour 7achtou bih akid..wi yewassi elli taou5ir 3alih lé.
Haya da5l elwazir Kochber li 9a3et el3arch el9a tojjar wou masou2li eldaoula 9a3din wou el malek DhouSourour metraba3 3ala 3archou..nafe5 sedrou wou chareb kerchou.
Ba3ed esslem wou ta7ia wel ejlel..wou9ef DhouSourour wou bdé fil klem.
DhouSourour: wazirna elakber Abou elkorss Kochber..ta3rref 3alech naditek elyoum 3ala jana7 elsor3a?
Abou elkorss Kochber: el3elem 3and rabbi sidna..mahou labes..haou eljme3a elkoll malmouma..ma3netha ya famma 7aja 5tira ya mchouma.
DhouSourour: te3jebni ya Kochber kif tkoun dhki..lmour khtira wou mchouma.
Abou elkorss Kochber: inchallah khir.
DhouSourour: lé mouch khir..mak rak rit wou sma3et elli cha3b zdom 3al le9sar..yenadi wou ye3ayet ye7eb yekel wou yetsala7 men 7alou.
Abou elkorss Kochber: sidna sma3et wou chofet..wou kallemet 9ayed el7arass mte3 le9ssar bech ya5ou etadabir ellazma..ema sidna mak ta3ref el7arb makhallat feha 7ata franc..elwadh3ia s3iba wou allah la traba7 elli ken asta wou sbab.
DhouSourour: amin..li hadha 9araret na3mel khitab lil cha3b..wou en3a9eb el masoul loul 3alli sarr fil bled..wel 3ou9ouba bech tkoun chadida..bech tousel lil i3dam.
Abou elkorss Kochber: wahawa kadhelek..klem souab sidna.
DhouSourour: wou 3araftou chkoun elmas2oul loul?
Abou elkorss Kochber: betbi3a sidna..el7adhrin elkoll lahna ya3rfouh..wa hal ya5fa el9amar.
DhouSourour: s7i7 ya 9amar.
Abou elkorss Kochber: chto9sed sidna..yedhorli mafhemtekech mli7.
DhouSourour: la la yedhorli fhemet..ya wazir Abou elkorss Kochber 7komna 3alik bil mout 3i9aban ennek jarrit lebled el7arb dharouss mouch moutakf2a dhed el3adou Chalghoumagne II.
Abou elkorss Kochber: SIDNA HEDHA MOUCH S7I7..ENI BEDHET 9OTLEK Lé..SIDNA EKHI MAL9IT FI CHKOUN TLASA9 ELMASOULIA KEN FIA ENI..WOUZIREK LA3DHEM..HEDHA KFOUA HEDHA KFOUIA.
DhouSourour: MEN GHIR NI9ACH YA KOCHBOR MEN GHIR NI9ACH..ETKADHEB FIA..ETBAZEZ FIA..THEB ET9OUL ELLI ENI DHALEM..GHODWA ELSBEH..BECH NERMIOUK FI SA7ET LEBLED M3A EL 10 KLEB ELLI 3ANDI..MAK TA3RAFHOM MOU7CHIN..BECH ETKOUN 3EBRA LIMAN YE3TBER.
Abou elkorss Kochber: Sidna madam elfess ta7 fil rass wou 9ararek khdhitou..eb7okm el3echra..enajem notlob talab menkom.
DhouSourour: inchalah khir.
Abou elkorss Kochber: Sidna madhabia ta3tini mohla 10 ayem..10 ayem akahaou..nachaba3 bil eddar wel sghar..wou men ba3ed a3mel elli t7eb.
DhouSourour: behi mouch mochkel..fil lekher bech tmout bech tmout..elyoum wella 10 ayem okhrin..ema a3ref elli eni 3azeltek..haya barra taou men 9odemi..wou a3ref elli mohltek tabda men elyoum..haya insaref.
Haya elwazir Kochber khraj..wou fi jortou yetab3ou fih 4 jnoud met5afin b3ath’hom wourah elmaled DhouSourour..bech ye3essou 3alih wou yejiboulou a5barou fil 7in.
Elwazir Kochber mché melloul eldarou..3elem martou wou sgharou..sallem 3ala bouh wou ommou wou ensabou..chef s7abou..wou men ba3ed mché lil jazzar..chra 10 kilo l7am bagri..wou mché lil zriba elli 7atin feha elkleb elli bech taklou..mandharhom etkhaouef sinnehom et9oul senin monchar..rmalhom el7am..kalouh wou houa mazel fil houa..wou men ba3ed raoua7 eldarou sakker elbab..lin etla3 esbe7..men ghodwa fi nhar ethane..kif kif mché lil jazzar chré 10 kilo l7am..wou hazou lil kleb ghazelhom mli7..ghazroulou mli7 wou rmalhom el l7am..kalaouh eb 3adhmou..ma5alaou fih chay..wou 9a3dou hayjin..wou raoua7 lil eddar wou sakker elbab lin tla3 enhar..khraj enhar etheleth..kif el3ada chré 10 kilo l7am wou hazhom lil kleb..rmahoulhom..klaouh wou makhalaou fih chay..7ata edam la7souh wou mchaou..wou houa rja3 eldarou wou sakker elbeb..haya 93ad 3al menwal hedheka 4 ayem..houa yechri el7am wel kleb tozrtou zartan..haya lekhbar wousel fil 7in lil malek wel ra3ia..elli tlammou bahtin fi elwazir Kochber wou elli ya3mel fih.
DhouSourour: ghriba fi hal wouzir Kochber ya jme3a..6 ayem wou houa ye3ach3ech fil kleb elli bech taklou.
Bach Hamba: sidna yedhorli fih mil sadma hbel wou hter..ta3ref ya sidna kilo el7am wousel eb9adeh taou..yedhorli fih ye7eb yosrof floussou elkoll 9bal maymout wallahi manich 3aref ya yesa5afni ya yedha7akni.
Salah eddin To7koumoun : sidna eni chakek fil 7kaya.
DhouSourour: kifeh trah.
Salah eddin To7koumoun : sidna lazmek tetsaref fisa3 fisa3..eni khayef lé elwazir Kochber..ka3ed ye5alli fil kleb troumou bil makla elli yewakalhom feha..wou nharet elli nermiouh binethom maya3mloulou chay..mak ta3ref elkalb wafiy.
DhouSourour: za3ma!!!???..cha3malna mela.
Salah eddin To7koumoun : sidna eni enra enou ma3adech enkhaliouh yo9robhom 9bal mayfout elfout..nharet eli yokhrej mil eddar cheddouh..e7bsouh..enti wou3edtou ebmohla mte3 10 ayem..mouch bedharoura ye3adiha fil chare3.
DhouSourour: wahwa kadhelek..Bach Hamba kallem el3asker bech yechedou Kochber wou ye7bsouh douba mayo5rej mil eddar.
Bach Hamba: sidna ma3loumetna et9oul elli elwazir Kochber melli dkhal eldarou nhar elrabe3 makhrajech..la3alla estinef wella mridh..sidna t7eb nozdmou 3alih?
DhouSourour: lé khalli ghodwa..douba may5rej cheddouh..la3alla mridh.
Haya nasboulou el3assa wi estannaouh 9oddem eddar..9odem eljazzar..9odem lekleb..chay mabanech..estanaouh kif kif men ghodwa wou chay..la 7ayata li man tounadi..haya balghou elmalek..elli habat eb tommi tamimou..wou sodmou 3al addar..elli l9aouha s9af wou 9a3a..mafeha 7ad..elwazir Abou elkorss Kochber..gate3 wou fsa3 mil bled 3andou 3 ayem.
Wa tamdhi alayam./.
Wa Tamdhi Alayam 